हाम्राे बारेमा

विद्यालय परिचय

       यो विद्यालयको स्थापना २०१७ साल पुष ८ गते भएको हो । प्राथमिक तह स्वीकृत वि.सं. २०२२/८/२७, नि.मा. तह स्वीकृत वि.सं. २०४० मा र मा. तह  अनुमति कक्षा ९ को वि.सं. २०५४  र कक्षा १० को सञ्चालन अनुमति वि.सं. २०५६ सालमा  प्राप्त भई एस. एल.सी. परीक्षामा वि.सं. २०५७ सालदेखी सामेल भएको छ । यो विद्यालयले सेवा क्षेत्र भित्रका बालबालिकाहरुलाई शिक्षा प्रदान गरिरहेको छ । 

विद्यालयको संक्षिप्त इतिहास

           वि.स.२००७ सालको राजनैतिक परिवर्तन पश्चात् देशव्यापी रुपमा फैलिएको शैक्षिक जनलहरसँगै वि.सं. २०१५ सालमा सोही गाउँका गजराम लिंथेपको सक्रियतामा गोठकटेरो निर्माण गरी मादी विर्ता ३ का ढुण्डीराज दाहाल मासिक रु ३० तलव भत्ता पाउने गरी शिक्षक नियुक्ति गरी विद्यालय सञ्चालन गरिएको इतिहास छ ।  एक वर्ष पछि हाल विद्यालय रहेको ठाँउमा विद्यालय सारियो । विधिवत रुपमा वि.सं. २०१७ साल पुष ८ गते विद्यालय स्थापना भएको देखिन्छ । वि.सं. २०२८ सालमा नयाँ शिक्षा ऐन लागु भएपछि सोही स्थानमा ४ कोठे भवनको निर्माण भएको थियो । लाल बहादुर देवानको प्रायोजकत्वमा बृटिस क्याम्प धरानबाट आर्थिक सहयोग प्राप्त भई चित्राको छाना हटाई इटाको छाना लगाइयो । उक्त विद्यालय वि.सं. २०२२ साल मंसिर २७ गते श्री ५ को सरकार शिक्षा विभाग प्राथमिक शिक्षा शाखाबाट श्री सरस्वती प्राथमिक विद्यालय मावादिन मैंवाखोला नामले स्वीकृत प्राप्त गर्यो । वि.सं. २०३१ सालमा रा.शि.प.यो. लागू भएपछि वि.सं. २०३१ फागुन ६ गते कक्षा १–३  को अनुमति प्राप्त भयो । वि.सं. २०३८ सालमा नि.मा. तहका कक्षाहरु थप गरी  वि.सं. २०४० सालमा नि.मा. तहका सम्पूर्ण कक्षाहरु स्वीकृत भए । यो कार्यका लागि यस विद्यालयका पूर्व शिक्षक दिलबहादुर गरुङ्ग र मादी मूलखर्क निबासी मानबहादुर मजियाको महत्वपूर्ण भूमिका रहेको थियो । नि.मा. तह निशुल्क बनाउन रु ६०,००० भन्दा बढी संकलन गरी बैंक व्यालेन्स र ऋण लगानी गरी प्राप्त व्याज रकमले निःशुल्क पठनपाठनसमेत भएको थियो । वि.सं. २०५५ साल पौष १ गतेदेखी कक्षा ८ को पठनपाठन समेत भएको थियो । माध्यमिक तहको अनुमतिका लागि शि. गोपाल प्रसाद प्याकुरेल र हर्ककुमार राईको उल्लेखनीय भूमिका रहेको छ । यो विद्यालयले वि.सं. २०५४ सालमा कक्षा ९ र वि.सं. २०५६ सालमा कक्षा १० सञ्चालन अनुमति प्राप्त गरी निजिस्रोतबाट मा. तह सञ्चालन गरी वि.सं. २०५७ सालदेखि विद्यार्थीलाई एस.एल.सि. परीक्षामा सामेल गराई हालसम्म माध्यमिक तहसम्मको शिक्षा प्रदान गरिरहेको छ ।

सुरुमा सेउले छाप्रोमा पठनपाठन गर्दै चारकोठे भवन निर्माण गरी विद्यालय सञ्चालन भएको थियो । विद्यालयको स्तरोन्नति हुदै जादा मुलभवन भएको स्थानमा आठकोठे कच्ची भवनको निर्माण गरिएको थियो । २०६० (सन २००४) तिर व्रिटिश वेलफेयर संस्थाले आठकोठे पक्की भवन निर्माण गरी हाल यसै भवनका अतिरिक्त ब्लकहरुमा विद्यालय सञ्चालन भइरहेको छ । विद्यालयलाई भवन निर्माण र खेल मैदानका लागि आवस्यक जमिन उपलब्ध गराउनु हुने स्व. मकर बहादुर लिंथेप, वहाँका छोराहरु स्व. मोहनसिं लिंथेप, स्व. छत्र बहादुर लिंथेप र स्व. हस्त बहादुर लिंथेपलाई भावपूर्ण श्रद्धाञ्जली अर्पण गर्दै साथै वहाँका नातिहरु स्व. टेक बहादुर लिंथेप, श्री वल बहादुर लिंथेप, श्री विजय लिंथेप, स्व. वीर बहादुर लिंथेप, श्री चन्द्रमान लिंथेप, श्री कमल लिंथेप र स्व. गणेश लिंथेप, श्री सन्त बहादुर तामाङ , श्री दोर्जे तामाङ (कृष्ण लामा ) इन्द्रा लिंथेप प्रति विद्यालय परिवार हार्दिक कृतज्ञता ज्ञापन गर्दछ । विद्यालयलाई जग्गा रजिष्ट्रेशनको व्यवस्था गर्ने काम मा.न.पा. ८ निवासी जानुका लिङ्थेप, ठाकुरसिं लिङ्थेप तथा मानवहादुर जिमीले गर्नु भएको थियो । विगत समयमा चन्दा सङ्कलन गरी सो को व्याजबाट शिक्षक त.भ. व्यवस्था गर्ने र तहगत शिक्षक दरवन्दीको व्यवस्थाका लागि कार्य गर्नुभएका मा.न.पा.८ निवासी श्री दिलकुमार गुरुङ धन्यवादका पात्र हुनुहुन्छ । विद्यालयमा व्रिटिश वेल्फेयर संस्था ल्याई आठकोठे भवन निर्माण गर्न पहल गर्नुहुने श्री तुलाराम लिङ्थेप तथा प्रायोजन गर्नुहुने स्व. श्री दिल बहादुर राई तथा गोर्खा वेल्फेयर संस्थालाई नसम्झिरहन सकिदैन । विद्यालय सदैव यो कार्यको प्रसंसा गरिरहने छ । शिक्षाप्रेमी महानुभावहरुले शिक्षाको विकासका लागि अक्षयकोष स्थापना गर्ने काम गर्नु भएको छ वहाँहरुको योगदानको कदर गर्नु विद्यालयको कर्तव्य ठहर गरेको छु । आफ्नो अदम्य साहास प्रदर्शन गर्दै धनपञ्च लिङ्थेप सन्तती अक्षय कोष, रणबहादुरफिपरानी स्मृति अक्षय कोष, रत्न लिलाला स्मृति अक्षयकोष, मावादिन हङ्कङ् समाज अक्षय कोष, मिठु स्मृति अक्षयकोष, चन्द्विर जसमाया शिक्षक पुरस्कार अक्षयकोष ,स्व.सूर्यप्रसाद स्मृति छात्रवृती अक्षयकोष , लक्ष्मी धनेन्द्र छात्रवृती अक्षयकोष, विद्यालय विकास छात्रवृती अक्षयकोष र विष्णु गौतम स्मृती छात्रवृती अक्षयकोष स्थापना गर्नुहुने दानवीर महानुभावहरुलाई विद्यालय परिवार विशेष धन्यवाद व्यक्त गर्दछ ।  

यस विद्यालयका हालसम्मका प्रधानाध्यापक, विव्यस अध्यक्ष तथा जग्गादाताहरुको विवरणः                          

प्र.अ.विवरण

हालसम्मका विव्यस अध्यक्षहरुको विवरण

प्राप्त अभिलेखका आधारमा निम्न व्यक्तिहरुले यस विद्यालयकोे अध्यक्षको कार्यभार सम्हाल्नु भएको छ 

हालसम्मका शि.अ सघंका अध्यक्षहरु

शिक्षा ऐन २०२८ सातौं संशोधनले व्यवस्था गरे बमोजिम वि.व्य.स.द्वारा गठन गरिने शिक्षक अभिभावक संघको हालसम्मका अध्यक्षको नामवली यसप्रकार रहेको छ ।  

विद्यालयको भौगोलिक अवस्था

         कोशी प्रदेशकाे  सुदुर उत्तरी जिल्लाको दक्षिण पूर्वको मादी नगरपालिका वडा नं ८ मा २७.२८७५५ं डिग्री उत्तरी अक्षांश तथा ८७.४१६३५ं डिग्री पूर्वी देशान्तरमा समुद्र सतहबाट १७२३ मिटरको उचाईमा उत्तरतर्फ फर्किएको मोडदार पहाडको बीचमा यो सरस्वती माध्यमिक विद्यालय रहेको छ । यो विद्यालयबाट रमणीय हिमचुलीको गुफापोखरी, मिल्के, हर्कटे जलजले, ढुड खर्क, भुवान डाँडा जस्ता लेकाली लालीगुँराको राजधानीको समेत  मनोरम दृष्य  अवलोकन गर्न सकिन्छ ।  विद्यालय रहेको स्थान मादी न.पा. ८ को पूर्वमा सिकुवा खोला, पश्चिममा लंखुवा खोला उत्तरमा पिलुवा खोला र दक्षिणमा भुवान डाँडाको बीचमा रहेको छ । भिरपाखा, खोलानाला, वनजंगल, बस्ती, खेतीका फाँट र अलैंची बगानका साथै राम्बेनी ओखरबोटे मावादिन ग्रामिण सडक पनि रहेको छ ।

विद्यालयको जग्गा विवरण

          यस श्री सरस्वती माध्यमिक विद्यालयको नाममा भएको जग्गाजमिनमा अलैंची खेती, भवन एवं शौचालय, खेलमैदान तथा पर्तिबाँझो अवस्थामा रहेको छ जसको विवरण निम्नानुसार रहेको छ ।